Masakit man sa kalooban ni lola Ignacia, mula sa Tondo, Maynila, na ipaampon ang kanyang pinakamamahal na alagang aso ay wala siyang magagawa dahil hindi na niya ito kayang alagaan pa matapos niyang ma-stroke.
Photo credit: AKF
“Na-stroke po ako at ito na lamang ang naisip kong paraan para isurrender siya. Sa sino man po ang makakakuha sa kaniya, sana ay mahalin at alagaan ninyo nang mabuti ang aso ko…”
Ayon sa Animal Kingdom Foundation (AKF), isang non-government organization, natanggap nila ang sulat ni Lola Ignacia kasama ang aso nito na nakasilid sa isang kahon.
“The letter was in the box, with the dog when found,” saad ng AKF.
Sa kanilang Facebook post ay ibinahagi ng AKF ang nakakaantig na sulat ni lola Ignacia.
Photo credit: AKF
“Humihingi po ako ng pasensya dahil ako ay may karamdaman at di ko na maalagaan ang aso ko na ‘di makatayo,” saad ni Lola sa kaniyang sulat.
Kwento ni lola, nag-utos lamang siya sa tricycle driver kung saan pwedeng ibigay ang kaniyang aso, at ibinilin dito na sana’y maipagpatuloy ng mag-aampon ang pagpapainom ng gamot ng kaniyang alaga.
Photo credit: AKF
Mababasa naman sa post ang sagot ng AKF sa sulat ni lola at sinabing nasa kanila na ang aso at nangakong, tulad ng kaniyang bilin, ay aalagaan nila ito nang maayos.
“Nakalulungkot na kailangan po ninyong gawin ito pero naiintindihan po namin ang iyong sitwasyon,” saad ng AKF.
“Ipagdadasal rin po namin kayo, na lumakas at gumaling. at kung sakali man, bukas po ang aming tanggapan upang inyong makasamang muli ang inyong mahal na alaga,” dagdag nito.
Photo credit: AKF
Dahil hindi raw nailagay ni Lola Ignacia ang pangalan ng kaniyang mahal na aso, tatawagin na muna raw ng AKF ito na “Tonton”.
Nanawagan rin ang AKF na sana’y mahanap nila si lola Ignacia upang ma-update nila ito sa kalagayan ni Tonton.
Si Tonton ay dadalhin sa isang shelter sa Capas, Tarlac.
Nangako rin ang AKF kay Lola na ipatitingin nila si Tonton sa doktor upang malaman ang dahilan ng kaniyang pagkaparalisa.
Sa ngayon ay uambot na sa mahigit 17k reactions at 3k shares ang post ng AKF.
***
No comments:
Post a Comment