Dating sexy star na si Sabrina M, inamin ang relasyon nila ng aktor na si Rico Yan

Sa kauna-unahang pagkakataon, inamin ng dating sexy star na si Sabrina M na nagkaroon sila ng lihim na relasyon ng yumaong aktor na si Rico Yan.

Photo credit to the owner

Kwento ni Sabrina, nangyari ang kanilang relasyon ni Rico ng maghiwalay sila ng dating ex-girlfriend na si Claudine Barretto.

“Napakabait ni Rico Yan. After Claudine, naging kami ni Rico Yan. Matagal kaming nagkarelasyon. Taon,” kwento ni Sabrina.

Nangyari ang rebelasyon sa isang press conference para sa pelikulang “Manang” ngayong Huwebes, Hulyo 6, na ginanap sa Quezon City.

Ayon sa ulat ng Manila Bulletin Entertainment, dahil magkaiba sila ng imahe, minabuti na lamang daw ng dalawa na itago sa publiko ang kanilang relasyon.

Kwento ni Sabrina, nang magsimula na raw ang tsismis noon na may relasyon sila, marami raw ang “dumurog” sa kaniya. Pinagtaasan daw siya ng kilay dahil pinatulan daw siya ni Rico na isang “hubadera.”

“Noong nag-uumpisa na yung tsismis sa akin, dinudurog na agad ako. Rico Yan ‘yan eh? Bakit siya pumatol sa isang sexy star? Bakit siya pumatol sa isang hubadera?”

“Pero bilib ako kay Rico dahil hindi siya mapanghusga. Pinagtatanggol pa niya (ako) sa ibang tao. Sinasabi niya kilala ko si Sabrina M, kaya huwag ninyo siyang i-judge,” aniya.

“Hon” pa nga raw ang tawagan nila o pinaiksing “honey.”

Nagkakilala raw sila nang mag-guest siya noon sa noontime show na “Magandang Tanghali Bayan (MTB)” sa ABS-CBN kung saan ito sa mga host. 

Ang MTB ay pinangunahan nina Randy Santiago, John Estrada, at Willie Revillame noon, katapat naman ng “Eat Bulaga!” ng TVJ.

Ani Sabrina, dumadalaw-dalaw raw siya sa puntod ni Rico kapag nagagawi siya sa sementeryong kinalalagakan ng mga labi nito. Noon ding mga burol ay naroon din siya.

Aniya, nang mawala ang aktor ay magkarelasyon pa silang dalawa. Dagdag pa niya, alam raw ni Claudine ang tungkol sa kanilang dalawa ngunit hindi nila ito pinag-usapan. Iginiit ni Sabrina na hindi niya inagaw si Rico mula kay Claudine.

“Alam po ni Claudine na naging kami. Pero never pa namin pinagusapan po. Wala namang problem kasi noong naging kami, wala na sila ni Claudine. Hindi ko naman inagaw si Rico sa kanya noong sila pala. Nagkaroon sila ng movie na ‘Got To Believe’ pero wala na sila no’n. Kami na no’n at alam ko meron na ring iba si Claudine noon,” aniya pa.

Si Rico ay namatay noong March 29, 2002 sa Dos Palmas Resort sa Puerto Princesa, Palawan dahil sa cardiac arrest dulot daw ng acute hemorrhagic pancreatitis habang natutulog.

Samantala, wala pang pahayag si Claudine o ang pamilya ni Rico tungkol dito.

***